Русский целитель — бессребреник

Когда прославлен бысть преподобный отец наш Антоний Печерский исцеления дарованием, прииде к нему из Киева в пещеру блаженный Агапит, желая душевного исцеления чрез! пострижение во святый иноческий чин: еже и получи. Великий той муж сам служаще болящим, и молитвою своею тех исцеляше: обаче (однако), покрывая дарование, молитве своей данное, зелие тем от брашна своего, аки бы то врачебное было, подаяше. Сие убо видев блаженный Агапит, многая лета труждашеся, ревнуя (подражая) в подвизех святому старцу: ибо егда разболяшеся кто от братий, оставляше блаженный келлию свою, и служаше болящему брату, воздвизая (поднимая), полагая, и на своих руках износя, Бога же непрестанно моля о спасении болящего, аще и продолжащеся иногда болезнь кому: сице (так) Богу благоволящу, да веру и молитву раба своего Агапита умножит. И тако последуя подвигом преподобного Антония, сподобися блаженный сей Агапит причастник быти тояжде с ним и благодати: исцеляше бо молитвою своею всех болящих, имже такожде подаяше зелие, еже брашна ради своего варяше. Того ради и врач прозван бысть, и мнози болящии прихождаху к нему и здрави отхождаху.

Бысть же в то время во граде Киеве врач некто, родом и верою арменин (из арминиан, еретиков), хитр зело во врачевании, ибо токмо воззрев на болящего к смерти, абие поведаше ему день же и час смерти, темже такового никакоже уже врачевати хотяше. От сицевых (таковых) болящих принесен бысть един в Печерский монастырь, иже бысть первый у князя Всеволода болярин, егоже арменин во отчаяние введе, прорек ему по осми дней смерть. Блаженный же Агапит, сотворив молитву о нем, даде ему в снедь зелия, еже сам ядаше, и здрава его сотвори: и абие (тотчас) промчеся о нем слава по всей земли Российской.

Армении же зависти стрелою уязвлен, нача укоряти блаженного, и посла в Печерский монастырь некоего на смерть осужденного, емуже смертного зелия дати повеле, да вкусив пред Агапитом, умрет. Блаженный же, видев сего умирающа, даде ему тогожде зелия, еже сам ядаше, творя молитву о нем: и тако избави от смерти повинного смерти. И оттоле наипаче вооружися на блаженного иноверный той арменин, и наусти единоверных своих, да подадут самому Агапиту смертное зелие испити: блаженный же, испив, без вреда пребысть. Весть бо Господь благочестивыя от напасти избавляти, иже рече: аще и что смертно испиют, не вредит их (2 Пет. 2; 9, Мк. 16; 18). Посем разболеся в Чернигове князь Владимир Всеволодович Мономах, егоже с прилежанием врачеваше арменин: обаче ничтоже успе, но паче недуг бываше болий. Темже князь уже при кончине сый, посла ко игумену Печерскому, уже тогда сушу Иоанну, моля, да послет к нему в Чернигов блаженного Агапита, врачевания ради. Игумен же, того призвав, извести ему моление князя, но блаженный Агапит, иже николиже виден бысть исходити вне врат и врачевати кроме монастыря, со смирением отвеща: "Аще ко князю сицеваго ради дела иду, то и ко всем иду. Молю тя, отче, да не будет ми пред монастырская врата изыти, славы ради человеческия, от неяже обещахся пред Богом до последнего моего издыхания бежати: аще изволиши, во ину паче страну иду, и потом возвращуся семо, егда нужда сия минет". Разумев же посланный от князя, яко не возможет самого блаженного Агапита к своему господину призвати, нача молити, да поне (по крайней мере) зелия на исцеление подаст. Принужден убо игуменом, блаженный даде посланному зелия от своего брашна: егоже егда князь вкуси, абие здрав бысть, молитв ради блаженного. Тогда князь Владимир Мономах прииде сам в Печерский монастырь, хотя видети, кто есть, имже Бог здравие ему дарова. Но Агапит скрыся: темже князь принесенное тому злато даде игумену. Обаче (однако) не по мнозе посла паки тойже Владимир единого от боляр своих со многими дары к блаженному Агапиту: егоже посланный в келлии обрет, положи пред ним еже принесе. Блаженный же рече ему: "О чадо, аз николиже (никогда) от кого что взях: понеже николиже исцелих силою моею, но Христовою, не требую убо и ныне сего". Отвеща болярин: "Весть, отче, пославый мя, яко не требуеши ничесоже, но молюся ти, утешения ради сына своего, емуже Бог здравие тобою дарова, приими сие, и даждь нищим". Глагола убо ему старец: "Понеже тако вещаеши, с радостью прииму. Рцы же пославшему тя, яко и от прочих, елика имать, ничтоже взяти возможет с собою, от жития отходя: темже да раздаст я нищим, молю, да не преслушает мя в том, да не что горее постраждет". Сия рек, взя блаженный Агапит принесенное злато, и иде с тем из келлии аки сокровения ради: и изнес вне келлии, поверже, сам же, бежав, скрыся. Болярин же помале изыде, и се, видев поверженныя пред враты вся дары, взем убо даде игумену Иоанну. Таже возвратися ко князю и поведа ему о блаженном вся, яже виде и слыша: и разумеша вси, яко истинный раб Божий есть. Князь же, не дерзая преслушати святого, нача нещадно раздаяти имение свое нищим.

По многих же трудех и подвизех Богоугодных разболеся сам безмездный сей врач, блаженный старец Агапит. Еже уведав преждереченный оный врач арменин, прииде к нему посещения ради, и нача стязатися с ним о врачебней хитрости, вопрошая его: "Каковым зелием врачуется таковый недуг?" Отвеща блаженный: "Имже Господь Сам, яко врач, души и тела здравие подаст". Разумев же арменин весьма невежду его во врачевании, глаголя к своим: "Не умеет сей ничтоже от нашея хитрости." Таже взем его за руку, рече: "Истину глаголю, яко в третий день умрети имать: аще ли изменится слово мое, тогда аз изменю житие мое, и буду сам таковый же монах". Блаженный же с гневом рече: "Таков ли есть твоего врачевания образ? О смерти паче, нежели о помощи твоей сказуеши. Аще искусен еси, даждь ми живот: аще же сим не владееши, что мя укоряеши, осуждая в третий день умрети? Мне бо известил Господь, яко по третием месяце имам отъити к Нему". Глаголя ему паки арменин: "Се, уже весь изменился еси, яко таковым николиже мощно жити более третияго дне". Изнемог бо зело старец, яко не мощи ему ниже двигнутися о себе. Между же сим принесоша к блаженному Агапиту, толико самому болящему, иного некоего больна из Киева, исцеления ради. Блаженный же пречудною Божиею помощью воста абие (сразу), аки не боле (как не болел), и взем обычное свое зелие, еже имяше в снедь, показа арменину, глаголя: "Се есть зелие врачевания моего, виждь и разумей". Он же, видев, глаголя святому: "Несть сие от наших зелий, но мню, из Александрии быти". Посмеялся же блаженный невежеству его, даде болящему вкусити зелия того, и помолився, абие здрава того сотвори. Таже глаголя ко арменину: "Чадо, молю тя, яждь тое зелие со мною, аще угодно ти есть, понеже не имам чим учредити (угостить) тя". Отвеща ему арменин: "Мы, отче, сего месяца четыре дни постимся, и ныне пост имам". Слышав же сия блаженный, вопроси его: "Кто еси ты, и коея веры?" Он же отвеща: "Не слышал ли еси о мне, яко арменин есмь?" Блаженный же рече к нему: "Како убо дерзнул еси внити семо и осквернити келлию мою? Еще же и держати... за грешную мою руку? Изыди от мене, иноверие и нечестиве!" Он же, посрамлен быв, отъиде. Блаженный же Агапит, по проречению своему, проживе три месяца и мало поболев ко Господу отъиде месяца июня 1 дня. Честныя же его мощи братия опрятавше (уложив прилично) по обычаю с пением в пещере преподобного Антония положиша. По смерти же святого прииде арменин в монастырь Печерский и глагола игумену: "Отселе уже оставляю арменскую ересь и истинно верую в Господа Иисуса Христа, Емуже работати желаю во иноческом святом чине, явися бо мне блаженный Агапит глаголя: «Обещался еси иноческий восприяти образ; аще солжеши, с животом и душу погубиши». Аз же верую, яко явивыйся мне святой есть, понеже аще бы хотел много время жити зде, даровал бы ему Бог; зане (ибо) аз разумех не прежити ему трех дней, Бог же приложи три месяца. Ныне убо мню, яко сам восхоте отъити от нас, яко святый, желая Царствия святых". Сия слышав от арменина игумен, постриже его во иноческий святый чин. Он же, подвизался Богоугодно житие препроводи, и в том же монастыре Печерском блаженную восприя кончину в честь Врачу душ и телес. Слава Господу нашему Иисусу Христу, со безначальным Его Отцем и с Пресвятым, Благим и Животворящим Его Духом, ныне и присно, и во веки веков. Аминь.

Память преподобного отца нашего Агапита, врача безмездного, Печерского чудотворца, совершается 1 июня.

(Из Патерика Печерского)

Поиск по сайту: