Праздник входа Господня в Иерусалим в Церковных песнопениях

Величаем Тя, Живодавче Христе, осанна в вышних, и мы Тебе вопием: благословен грядый во имя Господне!

Изыдите, языцы (народы), изыдите и людие, и видите днесь Царя Небеснаго, яко на престоле высоце, на жребяти худе во Иерусалим входяща... Приидите, уготовим Господеви к сретению, ветви добродетелей носяще Ему. Тако бо Его приимем в душе нашей, как во граде Иерусалиме покланяющеся и поюще Его. Яко из горы Елеонския, от высоты милостыней, секуще ветвие добродетелей, приидите, людие, уготовим к нам мысленно пришествие Христово, поюще, благословяще Его и превозносяще во вся веки. Принесем, братие, ваиа (ветви) добродетелей Христу Богу, волею грядущему нас ради человечески пострадати, Божества крепостию всем бессмертие даровати.

Прежде шести дней Пасхи глас Твой услышася, Господи, во глубинах адовых: темже и Лазаря четверодневна воздвигл еси; дети же еврейския взываху: осанна Боже наш, слава Тебе. Честное воскресение Твое прообразуя нам, повелением Твоим, Блаже, из гроба воздвигл еси умершаго, бездыханнаго Лазаря друга, четверодневна, смердяща, темже и на жребя восшед образно (знаменовательно), как на колеснице носим, языки (народы) укротевая, Спасе; сего ради и хваление приносит возлюбленный Израиль из уст ссущих (грудных) и младенец незлобивых, зрящих Тя, Христе, входяща во святый град, прежде шести дней Пасхи.

Камень ожесточения отвали, Господи, от моего сердца; умерщвленную страстьми воздвигни душу мою, Благий, во умилении принести Тебе ваиа добродетелей, яко Победителю ада, Владыко, сподоби; яко да вечный живот улучу, песнословя Твою державу и благоутробие Твое, едине Человеколюбче.

Се, предвозгласил еси, Иисусе, взыдем ко граду святому, и руками убийц воистинну предамся кресту, убитися плотию.

Пророков проповедания исполняя, в пророкоубийственный град, Христе щедрый, пришел еси убиен быти волею, убиенна мя тлею спасая.

Со страхом пою Твое страшное смотрение, еже осанна взываю Тебе: мене бо грядеши спасти, благословенный Господи.

Имея престол небо и подножие землю, Бога Отца Слово и Сын соприсносущный на жребяти бессловеснем смирися днесь, в Вифанию пришед; темже дети еврейския, ветви руками держаще, хваляху гласом: осанна в вышних, благословен грядый Царь Израилев!

На престоле на небеси, на жребяти на земли носимый, Христе Боже, Ангелов хваление и детей воспевание приял еси, зовущих Ти: благословен еси, грядый Адама воззвати!

На Серафимех страшных в вышних, Христе, носимый, яко Бог же и всех Творец, Сам на жребя на земли всести идеши, яко сый по нам человечески: Вифания веселится, приимши Тя, Спасе, Иерусалим радуется, яко чаяй Тя прияти; смерть умертвися, предощутивши Лазаря приити из мертвых; и мы с ваиами (пальмовыми ветвями) сретение совершающе, в радости воспеваем державу благости Твоея, Господи.

Внегда хотел еси достигнути в Вифанию, Христе, двоицу ученик Твоих посылавши привести Тебе жребя, на неже никтоже от человек вседе: кроме бо Тебе, Спасе, никтоже бессловесныя языки повину (никто не может подчинить себе неверные народы).

Всесвятый Дух, апостолы научивый глаголати иными странными языки, Той детем еврейским неискусозлобным (невинным) повелевает звати: осанна в вышних, благословен грядый Царь Израилев!

Хотящу Ти внити во святый град, Господи, ветви садов людие ношаху, Тебе поюще всех Владыку, и зряще Тя на жребяти седяща, как на Херувимех зряху, сего ради сице вопияху: осанна в вышних, благословен еси пришедый и паки грядый во имя Господне!

От незлобивых младенец, Христе, на жребяти седя, приял еси победную песнь, грядый ко страсти, трисвятым пением от Ангел воспеваемый.

Множество народа, Господи, постилаху по пути ризы своя; друзии же резаху ветви от древес и ношаху; предъидущии же и последующии зовяху глаголюще: осанна Сыну Давидову, благословен еси пришедый и паки грядый во имя Господне!

Собезначальный и соприсносущный Сын и Слово Отчее, на жребяти бессловеснем седя, прииде днесь во град Иерусалим; Его же Херувими со страхом зрети не могут, дети восхвалиша, с ваием и ветвьми, хвалу таинственно воспевающе: осанна в вышних, осанна Сыну Давидову, пришедшему спасти от прелести весь род наш!

Прииде Спас днесь во град Иерусалим исполнити Писания, и вси прияша в руки ваиа, ризы же подстилаху Ему, ведуще, яко Той есть Бог наш, Ему же Херувими вопиют непрестанно: осанна в вышних, благословен еси, Имеяй множество щедрот, помилуй нас!

Днесь благодать Святаго Духа нас собра, и вси вземше крест Твой, глаголем: благословен грядый во имя Господне, осанна в вышних!

Слава Тебе, Христе, в вышних седящему на престоле и ныне чаемому с честным Твоим крестом!.. Темже веселится дщи Сионова (Иерусалим), радуются языцы (народы) земнии, ветви держат дети, ризы же ученицы, и вся вселенная научися вопити Тебе: благословен еси, Спасе, помилуй нас!

Общее воскресение прежде Твоея страсти уверяя, из мертвых воздвигл еси Лазаря, Христе Боже: темже и мы, яко отроцы, победы знамения носяще, Тебе, Победителю смерти, вопием: осанна в вышних, благословен грядый во имя Господне.

Спогребшеся Тебе крещением, Христе Боже наш, бессмертныя жизни сподобихомся воскресением Твоим, и воспевающе зовем: осанна в вышних, благословен грядый во имя Господне!

Понеже ада связал еси, Бессмертне, и смерть умертвил еси, и мир воскресил еси, с ваиами младенцы воспеваху Тя, Христе, яко Победителя, зовуще Ти днесь: осанна Сыну Давидову! Не ктому бо заклани будут младенцы за Младенца Мариина, но за вся младенцы и старцы Един распинаешися. Не ктому на нас вместится меч, Твоя бо ребра прободутся копием. Темже радующеся глаголем: благословен еси грядый Адама воззвати!

Бог Господь и явися нам, составите праздник, и веселящеся приидите, возвеличим Христа, с ваиами и ветвьми, песньми зовуще: благословен грядый во имя Господа, Спаса нашего!

Пядию измеривый небо, дланию же землю, Господь прииде: Сион бо избра, во немже жити и царствовати изволи, и возлюбил люди, верно вопиющия: слава силе Твоей, Господи!

Радуйся и веселися, граде Сионе; красуйся и радуйся, Церкве Божия, се бо Царь твой прииде в правде, на жребяти седя, от детей воспеваемый: осанна в вышних, благословен еси, Имеяй множество щедрот, помилуй нас!

Веселися, Иерусалиме, торжествуйте вси любящии Сиона, царствуяй бо во веки Господь Сил прииде; да благоговеет вся земля от лица Его и да вопиет: благословите вся дела Господня, Господа.

Сионе Божий, горо святая, и Иерусалиме, окрест очи твои возведи, и виждь собранная чада твоя в тебе: се бо приидоша издалеча поклонитися Царю твоему. Мир на Израиля и спасение языком (для всех народов).

Восхвалите согласно, людие и языцы: Царь бо Ангельский взыде ныне на жребя, и грядет, хотяй на кресте поразити враги, яко силен; сего ради и дети с ваиами взывают песнь: слава Тебе, пришедшему Победителю; слава Тебе, Спасу Христу; слава Тебе, благословенному единому Богу нашему!

Воспойте, людие, боголепно в Сионе, и молитву воздадите Христу во Иерусалиме: Сам бо грядет во славе со областию (со властию), в Немже утвердися Церковь, зовущи: осанна, благословен еси грядый!

С ветвьми воспевше прежде, с древесы последи яша Христа Бога неблагодарнии Иудее; мы же верою непреложною присно почитающе яко Благодетеля, выну вопием Ему: благословен еси, грядый Адама воззвати!

Страшно еже впасти в руце Бога жива: Сей Судия есть помышлений и мыслей сердечных. Никтоже да внидет искушаяй веру непорочную, но в кротости и в страсе Христу приступим, да приимем милость, и благодать обрящем, во благовременную помощь".

Поиск по сайту: